古天樂同劉青雲喺今日中午12點左右喺《危城》facebook專頁同網友玩live，喺約15分鐘互動時間中，最多人就係想聽古仔再開金口，古仔笑住話：「我金盆洗手咗好耐。」當有網友叫佢哋兩位下次合唱電影主題曲，兼好掛住古仔首歌《男朋友》時，古仔笑住話：「呢位朋友冇病呀嘛？唔好搞啦。」青雲則表示本身係唔唱歌嘅。
問到若果兩人擔任導演，要佢哋再加演員入戲，佢哋會點揀？青雲諗咗好耐話好難答，因為冇位再加人，身旁嘅古仔即提議「加郭藹明做你情婦」，青雲以傻笑回應。再提到古仔同青雲多年來合作無數，問到佢哋想下次拍動作片定笑片？青雲話：「動作片好啲，笑片好辛苦。」
講到佢哋兩個合作無間，嚟緊會唔會好似譚詠麟同李克勤咁成組合，主持綜藝節目同開餐廳？青雲指本身只係演戲，唔識主持綜藝節目，加上開餐廳做生意就更加唔識。古仔就否定青雲講法，仲提青雲之前做過主持，青雲話：「冇錯，係得。」另有網民問古仔，若見到青雲同彭于晏跌落水會救邊個？古仔話：「我本身唔識游水，都係報警把啦。」
另外，古仔同青雲被問到點解廿幾年都保持得咁好？青雲就話：「呢個錄影係廿年前錄低。」至於被問點解兩位膚色都咁黑嘅時候？青雲指因為燈光問題，古仔補充指長期燈光唔夠。最後兩人被問到如果成為夫婦，誰做老公？誰做老婆？佢哋異口同聲指點答都死，應該兩個都係老公。
話說回頭，其實除咗《男朋友》，如果可以聽番古仔唱《像我這一種男人》，甚至《今期流行》就更加好喇……
今日古天樂幫新片《危城》宣傳，玩live chat時，有網民話掛住佢唱《男朋友》，古仔大叫「唔好搞」。
青雲（右）同古仔兩個全程邊講邊笑
古仔仲笑到趴枱
古仔話自己唔識游水（又估唔到喎）
青雲笑到標眼淚咁滯
【經典重溫】古仔另一隻名作《像我這一種男人》，卡拉OK版中見到一個古仔雙手掩胸嘅可愛表情
【經典重溫】其實古仔首《今期流行》真係好hit，嗰隻舞更加係大家嘅模仿對象……
文：網路轉載
