同張智霖合唱？古天樂皺晒眉：唔好啦！
09月14日(三) 21:58
【on.cc東網專訊】 影星古天樂（古仔）、張智霖（Chilam）、蔡少芬、林保怡、陳靜、盛君、蔡潔及監製黃百鳴等到旺角出席電影《S風暴》首映，榮升爸爸的周渝民（仔仔）未有到場，但有拍片分享拍攝電影時的心情。而現場大會向9月17號生日的蔡少芬送上壽包慶生，令她笑逐顏開。
媽媽冇催婚因為唔喺屋企？
台上司儀提到古仔及Chilam早於90年代已合作拍攝劇集《天地男兒》，劇中兩人爭女，到今次戲中則敵對，司儀問兩人現實中的關係如何？古仔說：「你想我點答？唔通係HeHe？」兩人受訪時表示今次是第四度合作，Chilam更突然自爆廿多年前兩人中秋煲蠟的往事：「突然醒起有年中秋，我、靚靚（袁詠儀）同古仔去煲蠟，係我第一次煲，當年我哋冇咁忙，多啲聚會。」問到今年如何渡過中秋，Chilam表示要到上海開工，古仔則難得有假期可留在家中陪屋企人，他直言每年大時大節如冬至、年初一都盡量爭取放假，問到母親會否催他帶另一半返屋企？古仔說：「唔會喎！屋企通常得我同阿爸，阿媽好忙好多活動。」
爆蔡少芬「隔空」陪囡囡
而問到會否跟蔡少芬慶祝生日？Chilam笑說：「佢正日生日我未返香港，而且佢有個可愛老公，兩個活潑嘅女，我哋無謂做電燈膽啦！」兩人又踢爆蔡少芬在大陸宣傳時，不停玩Live「隔空」陪伴女兒，非常癡纏。
破天荒開完金口唔想再唱
古仔最近為紀念已故巨星張國榮（哥哥）60歲冥壽，跟古巨基重錄金曲《當年情》，他說：「我好耐冇錄歌，好生疏，因為當年哥哥提攜我同基仔，仲有鄧一君，我同基仔咁多年都冇合作，佢咁啱有合唱呢隻歌嘅提議，想紀念哥哥，成個過程都順利嘅。（之前有冇操吓？）操咩？（操歌！）冇呀！」近年對唱歌頗為抗拒的古仔，今次開金口獲不少網友讚好聽，問到會否繼續唱歌，他即耍手擰頭，問會否有機會聽他唱Live？他皺眉頭說：「唔好啦！（同Chilam合唱？）唔好啦！唔該！今次已經係破天荒。」Chilam則笑言想跟古仔合唱，並對鏡頭說：「下次我演唱會一定要請古仔做嘉賓！」