活躍電影圈多年的型男古天樂飾演過無數角色，直言最高難度是挑戰經常飾演的警察角色，他又慶幸從未遇上樽頸位，並透露自己私下很怕鬼，不會睇恐怖片；而外表冷靜及作風低調的他，笑言食物是其興奮劑，更是一名「辣椒仔」！
◆食嘢令我Hyper
外表冷靜、作風低調的古仔，私底下究竟性格怎樣？遇到哪些事情會令其表現Hyper呢？他仔細想了一想，表示吃東西令自己最開心：「好難有嘢會令到我好Hyper，唯一係食嘢囉，因為我好鍾意食嘢，但我煎炸嘢唔食、甜嘢唔食、太鹹都唔食，辣就食，我反而係最鍾意食辣，食嘢會令到我Hyper，有人介紹我去邊度食嘢就好開心。(你咁低調會否介意被問及私生活？)冇㗎，你有你問，我有我唔答咋嘛，冇乜嘢㗎！(畀你再揀會否入行？)嘩，唔好揀嚟揀去啦，揀咗係就係㗎啦，唔好三心兩意喺度諗唔做呢樣做乜好、第時退休做啲乜，唔好諗咁多嘢，我係一心去做嗰樣嘢就會勇往直前去做嘅人，少說話多做事係我人生嘅座右銘。」
◆我唔睇恐怖片㗎！
從影多年的古仔談及還有哪些角色想演出，他坦言仍有很多角色未試過，但就一語道出拍戲的最高難度是挑戰經常飾演的角色：「做咩戲都係一個道理㗎啫，最緊要係做好個角色，有咩未做過？當然有好多，但我覺得最難做嘅係成日做嘅角色，即係差人(警察)，我好多戲都係做差人，好難搞㗎嘛，所以做一部戲要睇整體性，唔係淨係話個人，從中發掘一個新觀點去做先係最難。(有冇遇過樽頸位唔知點做？)都唔會嘅，每個角色嘅背景、性格都唔同，好難有樽頸位。」他續透露最喜歡看喜劇及最怕睇恐怖片，笑言自己很驚鬼：「我唔睇恐怖片㗎！除非嗰部戲真係出名到唔睇唔得，我成日飛嚟飛去，返到酒店房就真係唔慌唔驚啦！(你驚鬼？)梗係驚啦，好彩冇試過遇到。」
古仔有興趣踩過界搞設計。
古天樂
古仔扮過無數次警察，愈做愈考演技。
身為《星戰》迷的古仔，被問有否計劃衝向荷里活發展？他卻表示隨緣：「做好自己本分就得㗎啦，冇話計唔計劃，因為我自己做嘢每日都只係瞓三、四個鐘，瞓都冇時間。(屋企人有冇投訴你冇時間陪佢哋？)佢哋知我做呢行㗎嘛，冇投訴嘅。(有冇因忙碌工作錯過一啲緣分？)唔知喎，錯失嘅即係你唔知道㗎啦！」
◆唔使Keep都咁型
向以型男形象示人的古仔成為時尚界寵兒，談及如何長期保持身形穿靚衫，他表示每日的拍戲工作已消耗很多能量：「其實日日拍戲已經好大運動量，所以我冇乜刻意Keep㗎喎，平時開工已食無定時，瞓覺時間又顛倒晒。(你點保養？)冇㗎喎，我連補品都好少食。」
外表冷靜，原來心底好怕鬼。
古仔得天獨厚，忙到冇時間進補都咁型仔。
古仔話冇特別Keep Fit，隨時剝衫拍戲晒身材都掂。
早前他獲意大利品牌TOD'S邀請飛往新加坡出席全新概念店開幕典禮，自言是品牌忠實粉絲的他，有興趣跟品牌合作推出聯乘設計產品：「我鍾意品牌啲袋、鞋，由品牌好Signature嘅豆豆鞋開始鍾意。我有興趣同品牌合作推出設計產品，不過我覺得每個牌子都有自己好獨特嘅地方，就算合作都要了解番佢有乜特別嘢、過人之處，講吓自己嘅Idea點樣Crossover去做呢樣嘢。」
◆工作狂也顧家
作為藝人經常出埠工作，古仔表示如有時間旅行必定會做一件事：「我講咗好多年㗎啦，我好想去睇動物大遷徙，不過一定要九月、十月先睇得到，所以要夾時間好鬼難。」
古仔原來好鍾意食嘢，仲要無辣不歡。
新加坡藝人陳風玲(左起)與古天樂、歐萱，早前齊撐品牌開幕。
談及人生規劃，家庭、愛情、事業等會如何排位時，古仔坦言最憎排次序：「排嚟做咩呢？又唔係跑馬。(總有一樣較重要！)咁依家就梗係做嘢啦，工作係第一位。」身為工作狂的他透露仍跟家人同住：「我喺香港唔使開工就會返屋企陪佢哋，就算之前喺泰國拍兩個月戲，我中間有一個月都會返去一、兩次㗎！」
文：on.cc/網路轉載
