古生，雖然剛剛參加完你嘅生日party, 但係果句生日快樂就留返正日先講，因為我早你一日生日！ 今日你送嘅呢袋禮物就當係生日禮物^^

自我懂性以來，你嘅存在就已經陪伴住我，由你仲係白皮膚嘅時候開始。以前我無專注淨係睇你出演嘅戲（無可否認我都鍾意睇你嘅戲），因為本人並唔係外貌協會。換言之，我知道你嘅存在，但無特別去欣賞，一直到明日戰記上畫，我開始有啲轉變。

我一向有睇戲，甚少睇港產片，通常電視播影我先睇，因為覺得無乜新意，來來去去都係警匪片、黑社會、低級趣味等。我比較多睇西片，我第一套睇嘅電影係Terminator 2，緊張情節係收放自如，又無混雜到任何埕埕塔塔嘢，係純粹科幻動作片，劇情令我深信喺我哋未知嘅未來世界係會發生嘅，我到而家都覺得呢套係一個經典。

講到明日戰記，我竟然覺得係有Terminator 2嘅影子，我估唔到我有生之年會睇到香港人拍嘅科幻動作片。你肯投放咁多嘅effort落去創新港產片，甚至完全顛覆我對港產片嘅感覺，我對你佩服得五體投地，我重新認真去睇港產片都係因為你。

我都曾經係工作狂，除左食飯訓覺就係做野，想做到最好，對得住自己對得住人。見到你嘅工作態度，處事認真，行事同慈善十分低調，而唔係自吹自擂，呢方面我又好欣賞你。

尋日去apm睇你，你同其中一個記者講「我無回應」果下有少少惡，我係有啲驚，我有犹豫過係咪真係要參加今日呢個party。

對住鍾意嘅嘢，會覺得這麼近那麼遠，呢個係我剛才喺台下嘅感覺，諗緊到底古生係個點樣嘅人（你肯定係一個好人，呢方面我無懷疑過），同埋係咪真係一個人。你握住我手果3秒，我感受到一隻大、粗糙而有力嘅手，呢啲係歲月帶俾你嘅烙印，努力得來嘅戰績，就係呢一握，我肯定左你嘅真實感，雖然未能坐你旁邊影相，但係我已經好滿足，我唔可以咁貪心。一直到而家，除咗電話我隻右手乜都唔敢摸，又未捨得洗手……你有冇覺得隻手有陣蝦味，我食完蝦用紙巾抹完手就同你握手……

唔好意思，我知你唔太鍾意人哋叫你古生，但係一個尊敬你嘅我點能夠響你全朵或者叫古仔，叫英文名Louis又無乜親切感，我都係叫返你古生，你唔介意吧？

古生，祝你生日快樂，你同家人朋友都身體健康，青春常駐，笑口常開，每部戲都順風順水，就算有困難都迎刃而解，