| 古仔部落格及Louis Koo's Share https://www.kootinlok.com/share3.X/ |
|
| 掛念 https://www.kootinlok.com/share3.X/viewtopic.php?f=5&t=59798 |
第 1 頁 (共 1 頁) |
| 發表人: | Fionko [ 週五 3月 20, 2020 12:24 am ] |
| 文章主題 : | 掛念 |
"閉起雙眼你最掛念誰?"，我好掛住我嫲嫲，半年之前嫲嫲過世既時候，當晚我一個人喺醫院守住，陪佢走完人生最後既一段路，係其他人面前，我扮作若無其事，沒有任何悲傷，但嫲嫲離開後，我一個人在療養院離開回家o個段路，好漫長心好痛，從小同嫲嫲相處既日子好多，因為我無媽咪，老豆要搵食，從小就將我交左比嫲嫲，幼稚園嫲嫲拖住我隻手送我番學，讀小一放學好攰，嫲嫲揹住我回家，12歲時嫲嫲教我煮蕃茄牛肉同梅菜蒸肉餅，到而家我都成日煮呢兩個餸比我小朋友食，我會同我囡講，呢兩個餸係我嫲嫲的味道，到出黎做野，搬左出去住，間唔中都會去老人院探下嫲嫲，有時候會同佢去飲下茶，行下街去下街市買生果，每次嫲嫲都會講，出左黎好耐喇，你送我番老人院吧，但我知道其實嫲嫲係怕阻住我，怕麻煩到我所以先咁講，直到我囡出世之後，我已經好少去探佢，我好不孝。。。慢慢嫲嫲已經唔認得人，嫲嫲已經唔記得我係邊個，我嫲嫲係一個好乖既老人家，喺醫院清醒既時候，姑娘都讚佢好合作同埋好乖，會唔該前唔該後，直到佢臨離開最後幾個鐘頭，佢一路都好安靜，我默默地喺病床上面去陪住佢呼出最後一口氣，還好其他親友都來得及到醫院送佢，有時會諗嫲嫲90幾歲，佢一生人過得幸福嗎？我估幸福呢兩個字喺佢在世時離佢好遠好遠，嫲嫲有5個仔女，第5個細仔仲未出世時爺爺已經丟低頭家同第二個女人一走了知，嫲嫲呢世人都好辛苦，一個女人一手捱大5個小朋友，當年政府仲唔會有咩綜援可以拎，所有野只靠自己雙手，記得嫲嫲講過，以前爺爺屋企係有D錢，嫲嫲嫁比爺爺既時候，嫲嫲係少奶奶咩都唔洗做，屋企仲有馬姐用，當年可以請得起馬姐既家庭唔係好多，但嫲嫲突然間由天堂跌左落地獄個種痛苦同感受，我相信唔係好多人捱得住，希望嫲嫲去到天堂可以開心快樂，好好享受無憂無慮既日子，我好愛您好掛住您，願您在天國安好。。。 |
|
| 第 1 頁 (共 1 頁) | 所有顯示的時間為 UTC + 8 小時 |
| Powered by phpBB © 2000, 2002, 2005, 2007 phpBB Group http://www.phpbb.com/ |
|